៙ស្រីចំណាប់ ស្រាប់ចំនួន ស្ងួនស្រស់ណាស់
ឃើញភក្រ្ដច្បាស់ ដាស់បេះដូង អន្ទងនឹក
ដល់បុប្ផា ចារក្នុងចិត្ត ដិតរលឹក
ទាំងល្ងាចព្រឹក នឹកពិសី ស្រីនឹងនួន។
តើចរណៃ ថ្លៃកូនចៅ ផៅនរណា?
សូមវាចា ថ្លាថ្លែងមក ពន្លកស្ងួន
រៀមចង់ក្បែរ ថែមាសមេ រេថែថួន
បានជួបចួន នួនជីវា ណាស្នេហ៍ស្នង។
រាល់រាត្រី ស្ដីម្នាក់ឯង ថ្លែងសាសព្ទ
ប្រឹងរាយរាប់ ប្រាប់ព្រះអង្គ ផ្ចង់បន់ផ្សង
តែងភាវនា គ្រាយប់ជ្រៅ ពៅដឹងផង
ពីបំណង ចងចិត្តស្នេហ៍ ថែរយឆ្នាំ។
ស្នាមញញឹម ផ្ទឹមធម្មជាតិ ឃ្លាតម្ដេចបាន
បេះដូងច្រាន បានផុងចិត្ដ ស្និទ្ធផ្ដែផ្ដាំ
តាមស្រូវស្រែ ក្បែរចរណៃ ថ្លៃរងចាំ
ទ្រូងរងកម្ម ស្រាំយ៉ាងណា ថាមិនប្រែ៕៚
ថ្ងៃអង្គារ ៧កើត ខែមាឃ ឆ្នាំរកា នព្វស័ក ព.ស.២៥៦១
សៀមរាប ថ្ងៃទី ១៦ មករា ២០១៨
ម៉ោង ០៧៖៤៥នាទី យប់
អូរ អក្ខរា
No comments:
Post a Comment