#ស្រមោលអតីតដិតនៅកង់ចាស់

វេលាហួសហើយសល់តែអតីត

ហាក់មករួមរឹតចិត្តខ្ញុំម្តងៗ

ដូចខ្សែចងឆ្វាក់ដាក់ជាចំណង

គិតរឿងកន្លងដែលឥតបានការ។

ឃើញកង់កញ្ចាស់វាដាស់អារម្មណ៍

វីវក់លាយឡំស្មុកក្នុងចិន្តា

អន្ទងនឹកគិតដល់ភ័ក្រជីវ៉ា

យើងពីកាយាធ្លាប់ជិះកាន់ដៃ។

អង្គុយចោងហោងតោងបើកបង្អួច

រងាព្រឺព្រួចលួចមើលចន្ទ្រថ្លៃ

តារាហែហមរួមពិសម័យ

វេហាឆ្ងាយក្រៃឆោងពុំដល់ឡើយ។

សុំផ្ញើចិត្តនឹកតាមភ្លើងរាត្រី

ភ្លឺជះចំស្រីប្រាប់ដល់ត្រាណត្រើយ

ថាបងនឹកណាស់ម្ចាស់ស្នេហ៍ពៅអើយ

តើថ្ងៃណាឡើយយើងជួបជាថ្មី។

អូរ អក្ខរា សៀមរាបថ្ងៃទី០៩មករាឆ្នាំ២០១៧