មោទនៈភាពអង្គរ

សោភ័ណទេសភាព​សៀមរាបល្អ

ប្រាង្គប្រាសាទថ្មបវរក្រៃ

កេរកាលដូនតាសែនថ្លាថ្លៃ

ខ្មែរមានស្នាដៃ​ដ៏វិចិត្រ។​

ខ្ញុំមានវាសនា​កើតលើដី

ដែនខ្មែរបុរីក្រុងប្រណិត

បេះដូងមួយនេះលង់ស្នេហ៍ស្និទ្ធ

អង្គរល្អពិតនិត្យមិនណាយ។​

ភ្ងៀវគ្រប់ទិសទីមកទស្សនា

ប្រាសាទសិលា​ឥតខ្វល់ខ្វាយ

ជំនោរធម្មជាតិ​ត្រជាក់កាយ

រីករាយក្អាកក្អាយឥតមានហ្មង។​

ក្រមា​បង់កលម្អឆោម

សំយុងចុះក្រោមយោលជាយផង

ខ្លះក៏ជួតក្បាលតាមបំណង

ទទូរត្រសងឥតទាស់អី។​

គង្គាថ្លាយង់ចាំងឆ្លុះប្រាង្គ

សម្អិតសម្អាងគាប់ហឫទ័យ

ឃើញខ្ពស់ត្រដែតនភាល័យ

បិទភ្នែកមមៃ​មិនចង់ឃ្លាត។​

អូរ អក្ខរាសៀមរាបថ្ងៃទី១៥តុលា២០១៧