ណ្ហើយ...ចុះបានត្រឹមតែគិត!​

៙សូរ្យសែងលឿងទុំរុំអាកាស

ភ្លឺច្រាល​ដេរដាសគ្រងគ្របភ្នំ

ឯនាយទិស​បូព៌ប្រែស្រទំ

ស្រគត់ស្រគំតាមវេលា។​

រីឯរូបខ្ញុំ​ក្រៀមក្រំអ្វី?​

ចិត្តកាយ​ទីទៃមិនជុំគ្នា

អារម្មណ៍ហោះ​ហើរពេញមេឃា

រកក្បួនគណនា​ផ្គុំពុំត្រូវ។​

បើសិនមានស្លាបនឹងហោះភ្លាម

កាត់សមុទ្ររាមគ្រាឥលូវ

យកខ្យល់ធ្វើយាន​លម្ហជាផ្លូវ

ជួបមារសត្រូវក៏ផ្តាច់ប្តូរ។​

ណ្ហើយ...ចុះបានត្រឹមសញ្ជឹងគិត

រីឯងរឿងពិតឥត​អាសូរ

បេះដូង​ដាច់ដោចស្រក់ឈាមហូរ

បើ​ទួញយំ​ថ្ងូរគ្មានបានការ។​

ទោះបីក្នុងទ្រូង​រឹតគ្រាគ្រាំ

មានតែស៊ូទ្រាំតាមវាសនា

ធ្វើម្តេចព្រហ្មលិខិតលោក​ចារ

មានតែសោកាតាមអារម្មណ៍៕៚

ថ្ងៃអាទិត្យ ៥កើត ខែមាឃ ឆ្នាំរកា នព្វស័ក ពុទ្ធសករាជ ២៥៦១

ត្រូវនឹងថ្ងៃទី២១ ខែមករា ឆ្នាំ២០១៨

៙៙@៚៚

អូរ អក្ខរា