ចុតហ្មាយស្នេហ៍

ចុតហ្មាយស្នេហ៍

៙ប៊ិកខៀវមួយដើមដង្ហើមស្នេហ៍ 

រៀងរាល់ថ្ងៃខែតែងចងក្រង

ភាសាបេះដូងផ្ញើនួនល្អង 

មុនគេងរៀមផ្សងជួបឆោមឆាយ។

ឱ! ស្រុកជីក្រែងតែងបេះផ្កា  

ផ្ញើជូនជីវា និងចុតហ្មាយ

ម្លិះរួតរីកល្អក្រអូបសាយ  

ឱ្យស្ងួនអប់កាយណាមាសមេ។

នៅលើស្ពានថ្មវែងអន្លាយ 

នឹកស្នេហ៍នៅឆ្ងាយនឹកម្ល៉េះទេ

នឹកគ្រាកើយភ្លៅម៉ុមបំពេ  

គ្មានថ្ងៃងាករេប្រែផ្សេងឡើយ។

ពេលបងទទួលចុតហ្មាយអូន

បងលេងស្រពោនដូចមុនហើយ

អក្ខរាអូនចារឱ្យបងស្បើយ 

មិនយូរទៀតឡើយអូនវិលវិញ។៚

អូ សំអាត

សៀមរាបថ្ងៃទី ១៦ ធ្នូ ២០១៧

ម៉ោង ១២៖៥៥នាទី